Kunduchi, Dar es Salaam
Mbunge wa viti Maalum Mkoa wa Dar es Salaam kwa tiketi ya Chama Cha Mapinduzi (CCM) Janeth Mahawanga amezidi kuonyesha dhamira yake ya kumkomboa Mwanamke wa mkoani Dar es Salaam kiuchumi,kufuatia kukabidhi vyeti vya usajili na uandikishwaji wa vikundi saba (7) vya Wanawake wanaojishughulisha na ujasiriamali wa kugonga kokoto katika Kata ya Kunduchi.
Pamoja na kuwakabidhi vyeti vya Usajili na kuandikishwa katika hafla hiyo iliyofanyika Jumanne wiki hii, Mbunge Janeth amewafungulia Akaunti za Benki kwa ajili ya kukamilisha mchakato wa kupata mkopo Wanawake hao.
Hatua hiyo imekuja kufuatia ziara aliyoifanya Mbunge huyo Oktoba 8, 2021 kwenye mitaa mbalimbali iliyopo Kata hiyo ya Kunduchi ambapo aliguswa sana na wanawake ambao wanaponda kokoto kwa kutumia vifaa duni na hivyo kujipatia fedha kidogo ambazo hazitoshelezi kwa matumizi binafsi hivyo akaona ni vyema kuwapa elimu ya Vikundi, usajili na fursa ya mikopo.
Mbunge Janeth alihakikisha elimu hiyo inaeleweka kisha akaungana nao kutengeneza Vikundi, kuvisajili na kuungana na Benki ya CRDB kuhakikisha amevifungulia akaunti kupitia Benki hiyo vikundi vyote sita kimoja kikiwa nicha Vijana wenye Ulemavu ambao nao wanafanya shughuli za kugonga kokoto.
Akizunguma katika hafla hiyo Mbunge Janeth amewaahidi kuwa hatua ya mwisho ameishaitekeleza ambayo ni kuandaa maandiko ya miradi kwa ajili ya Vikundi hivyo ili kupata mikopo ya asilimia 10% inayotolewa kwenye kila Halmashauri na kwamba atahakikisha wanapata mikopo hiyo ili waweze kujikwamua kiuchumi kama jinsi ilivyo dhamira yake ya kumkomboa Mwanamke wa mkoani Dar es Salaam kiuchumi.
Amewashukuru Benki ya CRDB kwa kukubali kujumuika nao kutoka Ofisini na kuwafuata kinamama hao ili kuwafungulia akaunti lakini pia amewapongeza wanawake wote waliojitokeza kwa namna ambavyo wameendelea kushirikiana naye na kusisitiza ataendelea kuwa pamoja nao mpaka kuhakikisha lengo kuu la kumkwamua mwanamke kiuchumi linafanikiwa.
Mbunge Janeth amempongeza Rais wa Jamhuri ya Muungano wa Tanzania Samia Suluhu Hassan kwa namna ambavyo anaendelea kufanya kazi kuhakikisha Tanzania inapata maendeleo na amesisitiza kuendelea kumuunga mkono kwa kuhakikisha anatekeleza vyema Ilani ya CCM 2020/25 hasa kwenye suala la kuwainua wanawake kiuchumi kupitia mikopo ya Halmashauri na wadau mbalimbali wa maendeleo.
#TishaMama
#ItazameDarKiutofauti
#Kaziiendelee
Author Name
Author Description!
Post a Comment