IKULU, Dar es Salaam
Rais Dk. John Magufuli, amemuapisha Gerald Musabila Kusaya kuwa Katibu Mkuu wa Wizara ya Kilimo katika iliyofanyika leo Ikulu Jijini Dar es Salaam na kuhudhuriwa na viongozi mbalimbali wakiwemo Mawaziri, Makatibu Wakuu na Naibu Katibu Mkuu, Viongozi Wakuu wa Vyombo vya Ulinzi na Usalama na viongozi mbalimbali wa Wizara ya Kilimo.
Taarifa iliyotolewa leo na Kurugenzi ya Mawasiliano ya Rais, Ikulu jijini Dar es Salaam, imesema, Rais Magufuli amesema amemteua Kusaya kushika wadhifa huo kutokana na kazi nzuri aliyoifanya alipoteuliwa na Waziri Mkuu Kassim Majaliwa Majaliwa kuongoza timu za uchunguzi katika mazao ya pamba, korosho, tumbaku na mkonge.
Kwa mujibu wa Taarifa hiyo, Rais amemtaka Kusaya kushughulikia changamoto mbalimbali zilizopo katika Wizara ya Kilimo ikiwemo kusuasua kwa miradi ya umwagiliaji na kusimamia vizuri taasisi takribani 23 zilizopo chini ya Wizara hiyo zikiwemo bodi za mazao ili zitekeleze majukumu yake inavyopaswa na kuwanufaisha Watanzania ambao kwa kati ya asilimia 70 na 80 wanategemea kilimo.
Wakati huo huo, Rais Magufuli amekutana na ujumbe wa viongozi waliotumwa na Rais wa Jamhuri ya Uganda, Yoweri Kaguta Museveni wakiongozwa na Waziri wa Fedha wa Uganda Matia Kasaija na Waziri wa Biashara wa Uganda Amelia Kyambadde, Ikulu Jijini Dar es Salaam.
Pamoja na kuwasilisha barua kutoka kwa Rais Museveni, Mawaziri hao wamempongeza Rais Magufuli kwa kuendeleza na kukuza uhusiano na ushirikiano mzuri na wa kidugu kati ya Tanzania na Uganda na wamempongeza kwa juhudi kubwa za kufanya mabadiliko makubwa ya kiuchumi hapa nchini.
Author Name
Author Description!
Get Free Email Updates to your Inbox!
Post a Comment