SIMBA YASHINDWA KULIPA KISASI KWA YANGA, YAAMBULIA SARE YA 1-1 KWA MKAPA, LEO

Na Bashir Nkoromo, CCM Blog

Timu ya Simba imeshindwa kulipa kisasi kwa Watani wao wa jadi Yanga, baada ya kutoka Uwanja wa Mkapa jijini Dar es Salaam, wakiwa wameambulia sare ya bao 1-1 katika mechi ya marudiano ya Ligi Kuu ya NBC iliyopigwa katika Uwanja huo.

Katika mechi hiyo ambayo Simba walionekana kuwa walikuwa wamepania kulipiza kisasi cha kufungwa na Yanga bao 2-1 katika mechi iliyopita, leo wao ndio walianza kupata bao kupitia kwa winga wao Augustine Okrah katika dakika ya 15 ya kipindi cha kwanza.

Okrah akiwa amewapa raha mashabiki wa Simba, walistukia furaha hiyo ikiyeyuka baada ya Yanga kujibu mapigo kwa kupata bao murua kupitia kwa Kiungo Mshambuliaji wake Stephanie Aziz katika dakika ya 45 baada ya kupiga mpira wa faulo ulioenda moja kwa moja kimiani.

Kipindi cha Pili timu zote zilifanya mabadiliko huku kosakosa zikiendelea kila upande na hadi mwamuzi anapuliza kipyenga cha mwisho siyo Simba wala Yanga aliyeweza kuondoka na pointi tatu dhidi ya mwenzake.

Licha ya kushindwa kulipiza kisasi, Kwa matokeo hayo Simba wanaendelea kuwa kileleni wakiwa na Pointi 14 sawa na Yanga ambao pia wana Pointi hizo 14 tofauti ikiwa ni uwiano wa mabao ya kufunga na kufungwa tu.