Na James Mwanamyoto, Iringa
Naibu Waziri, Ofisi ya Rais, Menejimenti ya Utumishi wa Umma na Utawala Bora, Deogratius Ndejembi amewataka Waajiri kutowabadilishia vyeo vya kimuundo Maafisa Tarafa na Watendaji Kata walioajiriwa mwaka 2018 wakiwa na taaluma mbalimbali kwa lengo la kuziba nafasi zilizoachwa wazi na watumishi waliostaafu na walioondolewa baada ya kubainika kuwa na vyeti vya kughushi.
Ndejembi ametoa maelekezo hayo leo mkoani Iringa wakati akizungumza na Wakuu wa Idara na Taasisi mbalimbali mkoani humo na kusema, wapo baadhi ya Waajiri wamewabadilishia watumishi hao vyeo vya kimuundo bila kibali cha Katibu Mkuu Utumishi ambaye ndiye mwenye mamlaka ikizingatiwa kuwa alishatoa maelekezo ya kutowabadilishia kada wala kuwahamisha vituo vya kazi mpaka watakapotimiza miaka mitano.
"Watumishi hao wakati wa kuajiriwa, walisaini mikataba ya kutumikia vyeo vyao bila kubadilisha wala kuhama mpaka watakapotimiza miaka mitano, hivyo Waajiri kama mna upungufu wa Watumishi ambao wana sifa walizonazo watumishi hao, muombe kibali kwa Katibu Mkuu Utumishi ili mpatiwe watumishi mbadala." Ndejembi amesisitiza.
Ndejembi amesema changamoto ya Watumishi wa Umma kukaimu nafasi za uongozi kwa muda mrefu inatokana na baadhi ya waajiri kuwakaimisha Watumishi nafasi mbalimbali bila kuwa na kibali cha Katibu Mkuu Utumishi na kufafanua kuwa, asilimia zaidi ya 60 ya wanaokaimu hawana sifa za kutumikia vyeo walivyokaimishwa, hivyo wanapoteza sifa za kupata kibali cha Katibu Mkuu Utumishi na stahiki husika.
Ametoa mwito kwa Waajiri kuwaombea vibali kwa wakati kwa Katibu Mkuu Utumishi watumishi ambao wana sifa za kukaimu ili waweze kupata uhalali wa kutumikia vyeo walivyokasimiwa na kupata stahiki husika na kuongeza kuwa, hivi sasa ofisi yake inatoa vibali vya kukaimu kwa wakati ndani ya wiki tatu.
Ndejembi amefanya ziara ya kikazi mkoani Iringa yenye lengo la kuhimiza uwajibikaji kwa Wakuu wa Idara na Taasisi za Umma zilizopo mkoani humo.
Habari katika Picha👇
Author Name
Author Description!
Post a Comment